hijr hijrat se siwa ho gaya ghar aate hi
main to khud se bhi juda ho gaya ghar aate hi

aise soe hain ki marta bhi na hoga koi
jagte rahna bala ho gaya ghar aate hi

main gunahgar-e-safar tha mujhe kya nind aati
main to masruf-e-dua ho gaya ghar aate hi

main ne socha tha ki ghar ja ke mana lunga use
dil to kuchh aur khafa ho gaya ghar aate hi

ek dastak ka bada qarz tha mujh par 'asim'
aur wo qarz ada ho gaya ghar aate hi