ہمت تمام تم سے جٹائی نہیں گئی

ہمت تمام تم سے جٹائی نہیں گئی
ہم سے بھی آستین چڑھائی نہیں گئی
سکوں میں تول کر اسے زردار لے گیا
قیمت ہی ایسی تھی کہ چکائی نہیں گئی


شاید اسے وجود بچانا محال تھا
پربت کے آس پاس جو رائی نہیں گئی
تالاب میں نہانے کی ضد تم نے چھوڑ دی
پانی میں تم سے آگ لگائی نہیں گئی


سامان تو نے بانٹ لیا بے حسی کے ساتھ
ماں پر تری نظر مرے بھائی نہیں گئی
تنہا نہ اہتمام دو گانے کا ہو سکا
تیرے بغیر عید منائی نہیں گئی