حرص دنیا جو تری آنکھ کا تارا ہوا ہے

حرص دنیا جو تری آنکھ کا تارا ہوا ہے
یہ کسی کا نہ ہمارا نہ تمہارا ہوا ہے
سلوٹیں یوں ہی نہیں خاک بدن پر ہیں مرے
وقت کے ہاتھ نے پیکر یہ سنوارا ہوا ہے


مسئلہ صرف مری ذات سے وابستہ نہیں
دہر میں ہر کوئی تقدیر کا مارا ہوا ہے
رقص کرتا ہے جنوں شوق فراوانی پر
جب سے یہ عشق مری جان دوبارا ہوا ہے


کانپ اٹھی ہے سر شام چراغوں کی لو
ہاں کسی نے تو مرا نام پکارا ہوا ہے
اس نے توڑا ہے ابلتے ہوئے دریا کا غرور
ناخدا جو ابھی منجدھار سے ہارا ہوا ہے


یوں ہی ہونٹوں پہ نہیں ابھرے تبسم کے نقوش
بزم میں تو کسی جانب سے اشارہ ہوا ہے
یوں ہی سینے سے لگاتا نہیں کوئی بھی ایازؔ
خاک چھانی ہے تو یہ دشت ہمارا ہوا ہے