حساب عمر جب دینا پڑے گا

حساب عمر جب دینا پڑے گا
تو جمع و خرچ کا جھگڑا پڑے گا
ہمیں ہو گا خسارہ عمر بھر کا
تجھے سودا بہت مہنگا پڑے گا


بنی جو صلح کا باعث کسی دن
اسی دیوار کا جھگڑا پڑے گا
قدم الٹے جہاں پڑنے لگیں گے
وہاں سے راستہ سیدھا پڑے گا


خرابہ ہی کوئی آباد کر لو
نہ جانے کب تلک رہنا پڑے گا
ہوا کا رخ بدلنے کی طلب میں
ہوا کے ساتھ بھی چلنا پڑے گا


شجر بھی کاٹنے ہیں آنگنوں سے
پرندوں کا بھی دل رکھنا پڑے گا
دوراہے پر کھڑے کب تک رہو گے
کوئی تو فیصلہ کرنا پڑے گا