honton pe sahilon ki tarah tishnagi rahi
main chup hua to meri ana chikhti rahi

ek nam kya likha tera sahil ki ret par
phir umr bhar hawa se meri dushmani rahi

sadkon pe sard raat rahi meri ham-safar
aankhon mein mere sath thakan jagti rahi

yaadon se khelti rahi tanhai raat bhar
khushbu ke intizar mein shab bhigti rahi

wo lafz lafz mujhe pe utarta raha 'shakil'
sochon pe us ke nam ki takhti lagi rahi