hua naqib-e-bahaaran abhi nahin ai dil

hua naqib-e-bahaaran abhi nahin ai dil
ye rut badalne ka imkan abhi nahin ai dil
firaq-e-naghma se mere hi lab malul nahin
koi parinda ghazal-khwan abhi nahin ai dil


abhi kuchh aur khajil ho rah-e-tamanna par
tu is ke lutf ka unwan abhi nahin ai dil
use bhulane mein kuchh waqt to lagega mujhe
ye kaam itna bhi aasan abhi nahin ai dil


tum apni sari kamanden na phenk dena kahin
udhar wo chashm gurezan abhi nahin ai dil
sanwar kuchh aur ki jalwa-numaiyan teri
nigah-e-shauq ke shayan abhi nahin ai dil


charagh-e-khwab ho raushan to koi baat bane
nashat-e-dida-e-hairan abhi nahin ai dil