hum din ke payami hain magar kushta-e-shab hain
is haal mein bhi raunaq-e-alam ka sabab hain

zahir mein hum insan hain mitti ke khilaune
baatin mein magar tund anasir ka ghazab hain

hain halqa-e-zanjir ka hum khanda-e-jawed
zindan mein basae hue ek shahr-e-tarab hain

chatki hui ye husn-e-gurezan ki kali hai
ya shiddat-e-jazbaat se khulte hue lab hain

aaghosh mein mahkoge dikhai nahin doge
tum nikhat-e-gulzar ho hum parda-e-shab hain