hum kab az-khud tere ghar yar chale aate hain
rah nahin sakte to na-chaar chale aate hain

le khabar us ki shitabi se ki aashiq ko tere
ghash pe ghash shokh sitamgar chale aate hain

main to hairan hun matab hai ki dar-e-yar hai ye
yan to bimar pe bimar chale aate hain

ghar mein ghabraate hain be-yar to hum wahshi se
sar-barahna sar-e-bazar chale aate hain

khade rah sakte nahin dar pe to hairan se wan
baith kar hum pas-e-diwar chale aate hain

kis ke nalon ki ye aandhi hai ki shakl-e-par-e-kah
aaj udte hue kohsar chale aate hain