hum na hanste hain aur na rote hain
umr hairat mein apni khote hain

kha ke gham khwan-e-ishq ke mehman
hath khun-e-jigar se dhote hain

wasl hota hai jin ko duniya mein
yarab aise bhi log hote hain

kos-e-rahlat hai jumbish-e-har-dam
aah tis par bhi yar sote hain

dil laga us se mardum-e-dida
sath apne hamein dubote hain

aah-o-nala se wo khafa hai abas
kante hum apne haq mein bute hain

yaad aati hain us ki jab baaten
dil 'hasan' donon mil ke rote hain