hum tere shahr mein aae tere mehman bhi rahe

hum tere shahr mein aae tere mehman bhi rahe
tujh ko chaha bhi magar tujh se gurezan bhi rahe
ab kahin dur hain hum tere khayalon se magar
hum tere shauq ki rudad ke 'unwan bhi rahe


phir tere pyar ki wo sa’at-e-rangin na mili
gardish-e-waqt se hum dast-o-gareban bhi rahe
raat-bhar koi khalish dil ko satati hi rahi
band aankhon mein kai khwab pareshan bhi rahe


barha dil ko hua tark-e-ta'alluq ka junun
aur phir tujh se mulaqat ke arman bhi rahe
na gai dil ki ye aashufta-mizaji na gai
hum sulaiman bhi hue be-sar-o-saman bhi rahe


lut gain jin ke sabab dil ki bahaaren 'ma’sum'
gulshan-e-dil ke wahi log nigahban bhi rahe