hum ne dekhe ajab ajab gunge
thi zaban to magar the sab gunge

kar shikayat na be-zabanon ki
nutq wale hue hain jab gunge

hashr barpa hai bich dariya mein
donon sahil hain lab-ba-lab gunge

ye inayat hai ahd-e-hazir ki
silsila-ha-e-roz-o-shab gunge

be-adab hon zaban-daraaz agar
ho hi jate hain ba-adab gunge

zud-goi mein jo hue badnam
ban ke baithe hue hain ab gunge

un ko pani koi nahin deta
jo bhi 'nadim' hain tishna-lab gunge