humne yun KHud se tera zikr kiya sham ke baad

hum ne yun khud se tera zikr kiya sham ke ba'd
jaise gulshan mein chale sard hawa sham ke baad
mujh ko mai-khwar samajhti rahi shab-bhar duniya
jab tere hijr ka mashrub piya sham ke ba'd


jis ki yaadon ko bhulane mein guzar jata hai din
lab pe aa jata hai wo misl-e-du’a sham ke ba'd
ashk aankhon mein liye roz tujhe dhundhta hai
tere kuche mein koi aabla-pa sham ke ba'd


dil ki wahshat ke ye mausam bhi nirale hain 'umair'
band kamre mein barasti hai ghata sham ke ba'd