husn nikhar nikhar gaya wasl ki ek raat mein

husn nikhar nikhar gaya wasl ki ek raat mein
ishq bahak bahak gaya masti-e-wardat mein
raat tamam ho gai sirf takallufat mein
ishq tadap tadap utha husn ki baat baat mein


kitne rafiq the mere jab tha zamana-e-nashat
koi na ham-nawa hua waqt pe mushkilat mein
un ki nigah-e-awwalin dil mein sama ke rah gai
qurb se lutf hai siwa dur ke iltifat mein


dil se mujhe bhula saken aap ke bas mein ye nahin
yaad meri sataegi din se ziyaada raat mein
phaili hui hai raushni zer-e-qadam hai kahkashan
samne wo hain aur main gum hun tajalliyat mein