ibaraten chamak rahi hain dil mein tere pyar ki
diye ki lau mein jal rahi hai raat intizar ki

bhatak rahi hai aasman mein aarzu ki fakhta
zamin pe zindagi padi hai aag mein bukhar ki

meri wo manzilen na thin jo manzilen mujhe milin
meri nahin thi rah wo jo main ne ikhtiyar ki

jhulas gae nigah ke tamam khwab aanch se
ye dastan hai nazar pe raushni ke war ki

sula rahi hai beach rah mein thakan hamein 'charagh'
jaga rahi hai justuju magar tere dayar ki