insaniyat ka aaj ‘alam-dar kaun hai
ye bar ab uthane ko tayyar kaun hai

bazi laga ke jaan ki teri gali mein hum
dekhenge 'ashiqi ka taraf-dar kaun hai

taqdir le ke aa gai bazar mein hamein
ab dekhna hai apna talabgar kaun hai

chaaron taraf hai aaj ye 'uryaniyat ka jal
fitne se is ke yar khabar-dar kaun hai

sattar hai wo dhanpta hai sab gunah mere
warna 'asar' ke jaisa gunah-gar kaun hai