is bazm mein na hosh rahega zara mujhe

is bazm mein na hosh rahega zara mujhe
ai shauq-e-harza-taz kahan le chala mujhe
ye dard-e-dil hi zist ka bais hai chaara-gar
mar jaunga jo aai muafiq dawa mujhe


is zauq-e-ibtila ka maza us ke dam se hai
sab kuchh mila mila ho dil-e-mubtala mujhe
dair-o-haram ko dekh liya khak bhi nahin
bas ai talash-e-yar na dar dar phira mujhe


ye dil se dur ho na dikhae khuda wo din
zalim tera khayal hai dil se siwa mujhe
ranj-o-malal o hasrat-o-arman-o-arzu
jaane se ek dil ke bahut kuchh mila mujhe


main jaanta hun aap hain mast apne haal mein
'bekhud' nahin hai aap se mutlaq gila mujhe