is bharose pe ki shayad koi aae ghar mein

is bharose pe ki shayad koi aae ghar mein
hum ne diwar nahin dar bhi banae ghar mein
kaun ab naql-e-makani ki uthae zahmat
kaun aabaad kare khud ko parae ghar mein


chaliye taqon pe nahin to meri palkon pe sahi
kuchh diye to kaf-e-wahshat ne jalae ghar mein
khak-jismon mein koi khatra nahin hai dil ko
sang mahfuz hain mitti ke banae ghar mein


jis ko rakhni ho mohabbat ki chamak aankhon mein
qais-o-farhad ki taswir lagae ghar mein
meri binai ne khalwat se nikala mujh ko
meri tanhai ne paida kiye sae ghar mein