اس قدر آندھیوں سے ڈرتا ہے

اس قدر آندھیوں سے ڈرتا ہے
وہ قفس میں اڑان بھرتا ہے
اس سے کچھ بھی نہیں چھپاتے ہم
وہ ہمارا علاج کرتا ہے


کئی تو پیڑ کی جڑوں میں ہے
جو پھلوں میں مٹھاس بھرتا ہے
ختم یہ زندگی نہیں ہوتی
آدمی تا حیات مرتا ہے


لاکھ زینے بناؤ لیکن چاند
ٹوٹی چھت پر نہیں اترتا ہے
اتنے تارے کہاں سے آتے ہیں
آسماں پر یہ کیا بکھرتا ہے


روز بتلاتا ہوں چراغوں کو
کتنی مشکل سے دن گزرتا ہے
تان رکھی ہے اس طرح گردن
جیسے ہم سے بھی کوئی ڈرتا ہے