is se hi baqi hai sanson ki rawani logo

is se hi baqi hai sanson ki rawani logo
mujh se mat chhino meri aankh ka pani logo
aagahi karb ke imkan badha deti hai
mat sunao mujhe ye sari kahani logo


parsai ki gawahi to na mango us se
tanha bewa ne guzari hai jawani logo
hum bayabanon ke 'adi the kahin par na base
dasht-e-tanhai mein ki naql-e-makani logo


hum ki sada rahe jiddat mein na dhaala khud ko
hum ko aae hi nahin taur-e-zamani logo
us ki taswir ko chupke se jalaya main ne
wo thi kam-zarf mohabbat ki nishani logo