عشق کے کام کو انجام نہیں کرتے ہم

عشق کے کام کو انجام نہیں کرتے ہم
عشق ہو جائے تو پھر کام نہیں کرتے ہم
ایسے لمحوں میں وہ کرتا ہے عطا خلعت وصل
جب کوئی خواہش انعام نہیں کرتے ہم


پوجتے پوجتے اک بت کو خدا کر ڈالا
کون کہتا ہے کہ اسلام نہیں کرتے ہم
آپ کا جسم شریعت کا ہے پابند بہت
جائیے آپ پہ الہام نہیں کرتے ہم


دیوتاؤں کو لڑاتے نہیں آپس میں کبھی
کرشن کرتے ہیں تو پھر رام نہیں کرتے ہم
برہنہ ہی حرم جسم کا کرتے ہیں طواف
روح کی گردش احرام نہیں کرتے ہم


اس کے دیدار کا سورج نکل آئے جس روز
صبح سے پھر طلب شام نہیں کرتے ہم
فرحت احساسؔ تجھے شاعری کرنے کے لئے
الٹا سیدھا ترا کیا کام نہیں کرتے ہم