جب کبھی آیا تو ذکر مئے گلفام آیا

جب کبھی آیا تو ذکر مئے گلفام آیا
کفر آیا ترے رندوں کو نہ اسلام آیا
پھر کہاں بھاگ کے جائیں گے یہ تیرے وحشی
گر تری زلف کے سائے میں نہ آرام آیا


ہم تو برباد تھے برباد ہی ہونا تھا ہمیں
کیوں تری چشم عنایت پہ یہ الزام آیا
سی لیے ہونٹھ کہ اندیشۂ رسوائی تھا
پھر بھی ہر سانس میں چھپ چھپ کے ترا نام آیا


بات تو جب ہے بنے آج کوئی میرا حریف
عشق میں جان گنوا دینے کا ہنگام آیا
مے کدے سے جو چلے دار و رسن تک پہنچے
آج یہ پی کے بہکنا بھی بہت کام آیا