jab pyar nahin hai to bhula kyun nahin dete
khat kis liye rakkhe hain jala kyun nahin dete

kis waste likkha hai hatheli pe mera nam
main harf-e-ghalat hun to mita kyun nahin dete

lillah shab-o-roz ki uljhan se nikalo
tum mere nahin ho to bata kyun nahin dete

rah rah ke na tadpao ai be-dard masiha
hathon se mujhe zahr pila kyun nahin dete

jab us ki wafaon pe yaqin tum ko nahin hai
'hasrat' ko nigahon se gira kyun nahin dete