jab se nasib mera Thikane pe aa gaya

jab se nasib mera thikane pe aa gaya
khud hi shikar mera nishane pe aa gaya
parda-nashin parda-nashini mein gum rahe
ilzam mere aankh uthane pe aa gaya


jis ko samajh raha tha faqat aastin ka sanp
wo sanp mere dil ke khazane pe aa gaya
hathon se us ke chhut gain raunaqen tamam
insan jab se aab pe dane pe aa gaya


tahqiq ki to apne muqabil tha mera aap
jab main tabahiyon ke dahane pe aa gaya
hum ne lahu se jis ko jalaya munder par
ab wo charagh ghar ko jalane pe aa gaya


'arif-nazir’ shauq se pine ko aaenge
tishna-labon ko tu jo pilane pe aa gaya