jab se tu bad-guman hai pyare
ek musibat mein jaan hai pyare

dil lagana mazaq samjhe ho
sakht ye imtihan hai pyare

dil ki rudad kya kahun tum se
khun-chakan dastan hai pyare

baat karte hi phul jhadte hain
wah-wa kya zaban hai pyare

nahin rahti kisi ki shan mudam
ye khuda hi ki shan hai pyare

tum bhala kyon kisi pe zulm karo
fitna-gar aasman hai pyare

sar-e-mahfil wo mujh se bole 'qadir'
khub tarz-e-bayan hai pyare