jab shahr-e-dil mein paD gae us zar-badan ke panw

jab shahr-e-dil mein pad gae us zar-badan ke panw
padte nahin zamin pe ab is chaman ke panw
wo kaun aaj raaton mein ghar se nikal pada
uthne lage hain shahr ki samt aaj ban ke panw


lao to dho dun ashk se wo panw main zara
teri gali se aae hain us barhaman ke panw
kahta hun dil mein aane ko aata nahin hai wo
rakhta nahin hai sil pe wo apne sanam ke panw


aaya to dil mein baith gaya ban ke dewta
utthe nahin hain 'ishq-e-dil-e-but-shikan ke panw
‘irfan-e-'ishq tod de zanjir-e-fe’l ko
ruk jaen apne aap hi aawagawan ke panw


ab tak hai qalb-e-'shams' se raushan ye khalq bas
ek bar pad gae the jo sho’la-badan ke panw
sare tamaddunon ka hai khatre mein ab wajud
thamte nahin hain par kabhi gang-o-jaman ke panw