جب تلک خاک میں ملا نہ دیا

جب تلک خاک میں ملا نہ دیا
اس نے اپنا کوئی پتہ نہ دیا
اور پھر اڑنے والے لوگوں نے
چلنے والوں کو راستہ نہ دیا


خاک ہوتا نہ میں تو کیا کرتا
تیری چوکھٹ نے راستہ نہ دیا
یاد میں نے نہیں کیا خود کو
اس نے جب تک مجھے بھلا نہ دیا


جیب خالی تھی اور خالی رہی
میں نے دنیا سے کچھ لیا نہ دیا
دم لرزتا رہا لبوں پہ مرے
دھیان اس نے مگر ذرا نہ دیا


مٹی سب چاک‌ میں لگا دی مری
کوزہ گر نے معاوضہ نہ دیا