جب اس کی طرف سے کوئی پتھر نہیں آتا

جب اس کی طرف سے کوئی پتھر نہیں آتا
جو بوجھ مرے دل پہ ہے مجھ پر نہیں آتا
دریا ہوں اور اک عمر سے بہنے میں لگا ہوں
لیکن مرے حصے میں سمندر نہیں آتا


تم لوٹ کے آئے بھی تو اس دل میں کہ جس میں
گزرا ہوا موسم بھی پلٹ کر نہیں آتا
ہاتھوں کی لکیریں کہیں لے کر نہیں جاتیں
الجھے ہوئے رستوں میں کبھی گھر نہیں آتا


یعنی ترے ہوتے ہی وہ تعمیر ہوا ہے
رستہ کوئی اس شہر سے باہر نہیں آتا
اس دل سے الگ تو نہیں اس آنکھ کا ہونا
کیا شاخ سے پھل گر کے زمیں پر نہیں آتا


اک خواب حقیقت میں بدلتا نہیں حارثؔ
اک درد ترے ہجر کے اندر نہیں آتا