jab zamir-o-zarf ke saude na the
yun sar-e-bazar hum bikte na the

muflisi aansu bahati rah gai
bhuk thi bazar tha paise na the

kuchh bharam rakhne ko rakhte rabta
go ki paiman-e-wafa sachche na the

kis mein jurat thi lagata boliyan
hum kabhi bazar mein saste na the

wo uthate kis liye dushwariyan
mere ghar tak marmarin raste na the

waqt ne kitna badal dala mizaj
aaj hum jaise bhi hain aise na the

kuchh to hai 'ajmal' khamoshi ka sabab
aap afsurda kabhi rahte na the