jag uthe baam-o-dar charagh jale
kaun aaya idhar charagh jale

din ki pamal fikr ko hai shart
teri jaanib safar charagh jale

zulf-e-tufan se yun bhi chhed sahi
wo bujhae idhar charagh jale

din mein wo jism hai junun-afroz
ek qayamat magar charagh jale

waiz-o-mohtasib bhi jam-ba-lab
hum ko aae nazar charagh jale

aakhir-e-shab dilon pe hai bhaari
ham-nafas ta sahar charagh jale

sarguzasht-e-wafa hai tulani
bas yahi mukhtasar charagh jale

aaj mehman hai ek shab-afroz
aarzuon ka har charagh jale

zindagi shab-charagh hai 'saifi'
ab raqibon ke ghar charagh jale