jaisa jaisa hum ne chaha waisa waisa ho gaya
dhire dhire haule haule rafta-rafta ho gaya

ab mohabbat bhi nahin hai aur shikayat bhi nahin
baat mano ya na mano lekin aisa ho gaya

dekhte hi dekhte ahbab rukhsat ho gae
dekhte hi dekhte jag mein andhera ho gaya

kis qadar shaffaf tha jab tak teri aankhon mein tha
aaine tak aate aate 'aks maila ho gaya

kaun kah sakta hai dil mein aag kis lamhe lagi
pal do pal ke khel mein ek pal ziyaada ho gaya

kis taraf se raat aai kis taraf le ke gai
main ne to cigarette jalai aur sawera ho gaya

munfarid hota to mujh ko kyon koi pahchanta
sach to ye hai main bhi 'amir' sab ke jaisa ho gaya