jam jo tinke kiye the aashiyane ke liye

jam' jo tinke kiye the aashiyane ke liye
ho gae majbur hum khud hi jalane ke liye
har khushi ka kuchh na kuchh gham se ta'alluq hai zarur
gham koi lae kahan se muskurane ke liye


han inhin logon ne chhup kar ghar jalaya hai mera
mehrban ban kar jo aae hain bujhane ke liye
kya hui wo raunaq-e-aina-khana kya hui
ek nazar kafi thi jis ke muskurane ke liye


raat ki zahrili nagin pi gai jalte charagh
hum to nikle the andheron ko mitane ke liye
kitna sada-lauh sada-dil hai 'sabir' aaj bhi
gham uthata hai zamane ke zamane ke liye