جاؤں پھر اس کو منانے کے لئے

جاؤں پھر اس کو منانے کے لئے
کچھ نئی قسمیں ہیں کھانے کے لئے
کچھ لطیفے سے زیادہ چاہئے
بیٹھے بیٹھے مسکرانے کے لئے


بس ذرا سی دھوپ مل جاتی ہمیں
اپنے گیلے پر سکھانے کے لئے
یہ جو اب روتے ہیں گھر کی یاد میں
مر رہے تھے ساتھ آنے کے لئے


ایک ساتھی ہوش میں رکھا گیا
واپسی میں گھر بتانے کے لئے
دشمنوں کو گھر پہ لے کر آ گئے
اپنی تیاری دکھانے کے لئے


ہوش تھوڑا سا بچا لیتا ہوں میں
واپسی میں لڑکھڑانے کے لئے