جنہیں ہم یاد کر کے رو رہے ہیں

جنہیں ہم یاد کر کے رو رہے ہیں
انہیں مردوں کا ورثہ ڈھو رہے ہیں
وہ کھینچے جا رہا ہے اپنی جانب
ہم اپنی حد سے باہر ہو رہے ہیں


ہمیں قسطوں میں مرنا پڑ رہا ہے
وہ قسطوں میں پرائے ہو رہے ہیں
متاع زندگی کی پیٹھ پر ہم
تمہاری بے رخی بھی ڈھو رہے ہیں


بڑا الٹا زمانہ آ گیا ہے
محبت کرنے والے سو رہے ہیں
خدا کا شکر ہے غم پر ہمارے
جو خوش ہوتے تھے وہ بھی رو رہے ہیں


ہم اپنے صحن کے گملوں میں اب تک
تمہاری مسکراہٹ بو رہے ہیں