جنہیں عروج ہمارا گراں گزرتا ہے

جنہیں عروج ہمارا گراں گزرتا ہے
سکوں سے ان کا کوئی دن کہاں گزرتا ہے
وہ چھوڑ جاتا ہے فتنوں کے درمیاں ہم کو
ہمارے شہر سے جب بھی فلاں گزرتا ہے


مسرتوں کے یہ موسم بھی اس طرح گزرے
کسی مکان سے جیسے دھواں گزرتا ہے
اگر شریک سفر ہو مزاج سے واقف
تو زندگی کا سفر کامراں گزرتا ہے


بھٹکنے والے مسافر کی رہبری کے لئے
غبار اڑاتا ہوا کارواں گزرتا ہے
جبیں پہ سجدے کی حسرت مچلنے لگتی ہے
نمازیوں پہ جو وقت اذاں گزرتا ہے


اسی کی ذات پہ کرتا ہے رشک یہ عالمؔ
جو چھوڑ کر کوئی دل کش نشاں گزرتا ہے