jis ke husn ki shohrat mujh pe bar guzri thi
aaj phir wahi ladki rah roke thahri thi

wahm ki nigahon ne kitne hadse dekhe
khatt-e-pesh-e-manzar par ek kali billi thi

sanp sungh jata tha jo use baratta tha
dekhne mein wo aurat shahd ki katori thi

ruh mein ubharti thi tere qurb ki khwahish
main ne apne honton pe teri pyas dekhi thi

hiddaton ki barish mein sukhti thin shiryanen
chhanw ki talab mere sehn-e-dil mein ugti thi