جس کی اک دید بھاؤ ہے دل کا

جس کی اک دید بھاؤ ہے دل کا
اس کی جانب جھکاؤ ہے دل کا
عقل ہر چیز سے الجھتی ہے
کتنا اچھا سبھاؤ ہے دل کا


تیری یادیں بھی جھونک دی اس میں
یہ جو روشن الاؤ ہے دل کا
وہ جسے لوگ عشق کہتے ہیں
سچ کہوں تو لگاؤ ہے دل کا


ہے روانی میں زندگی اس کی
اک ندی سا بہاؤ ہے دل کا
تو نہ آئے تو تھمنے لگتا ہے
مجھ پہ کتنا دباؤ ہے دل کا


دیکھتا بھی نہیں کسی جانب
اس گلی میں پڑاؤ ہے دل کا
کسی اپنے کا تیر تھا عدنانؔ
کیا دکھاؤں جو گھاؤ ہے دل کا