jite hue ghabraate hain ye log ajab hain

jite hue ghabraate hain ye log 'ajab hain
be-maut hi mar jate hain ye log 'ajab hain
gardan pe chale tegh ki sine pe chale tir
rote hain na chillate hain ye log 'ajab hain


hans hans ke koi de to bila-khauf-o-taraddud
zahrab bhi pi jate hain ye log 'ajab hain
khud maskh-shuda chehre liye phirte hain lekin
aaina bhi dikhlate hain ye log 'ajab hain


maghmum bhi hote hain to aate hain nazar shad
'ghaalib' ki ghazal gate hain ye log 'ajab hain
sunte hain ki dana hain magar aisi himaqat
diwane ko samjhate hain ye log 'ajab hain


wahshat ke bina jate hain sahra ki taraf kyon
jate hain to laut aate hain ye log 'ajab hain