جتنے دریا ہیں سمندر کی طرف کھلتے ہیں

جتنے دریا ہیں سمندر کی طرف کھلتے ہیں
ہم بھی دریا ہیں پر اندر کی طرف کھلتے ہیں
حجرۂ زخم سے باہر کی کوئی راہ نہیں
کچھ دریچہ ہیں جو اندر کی طرف کھلتے ہیں


شاخ دنیا پہ بس اک پھول ہے چہرہ اس کا
دل بھی اکثر اسی منظر کی طرف کھلتے ہیں
سارے صحراؤں پہ دروازہ ہے تنہائی مری
سارے ویرانے مرے گھر کی طرف کھلتے ہیں


خون کی دھار کو معلوم ہے منزل اپنی
سب گلے اپنے ہی خنجر کی طرف کھلتے ہیں
سب کی مٹی میں ہیں کچھ راستے اندر اندر
جو کہیں دور سمندر کی طرف کھلتے ہیں