جو نیک راہوں سے ہم بھی گزر گئے ہوتے

جو نیک راہوں سے ہم بھی گزر گئے ہوتے
خلا میں آج یقیناً ابھر گئے ہوتے
تمہارے ساتھ گناہوں میں ہوتے شامل تو
سزائے موت سے پہلے ہی مر گئے ہوتے


تمہیں زمیں کی حقیقت کی بھی خبر ہوتی
بلندیوں سے اگر تم اتر گئے ہوتے
شکاریوں کی سمجھتے نہ سازشیں ہم تو
ہمارے پنکھ تو کب کے کتر گئے ہوتے


رئیس لوگ تھے محفل میں آپ کی شاید
تو ہم ذلیل ہی ہوتے اگر گئے ہوتے
ہمارے پاس نہ آتے تو کوئی بات نہ تھی
جو آ گئے تھے تو لے کر خبر گئے ہوتے


تلاش رزق میں کھاتے ہیں دھول شہروں کی
ہوئی تھی شام نظرؔ ہم بھی گھر گئے ہوتے