jo soz-e-mohabbat mein jalte rahe

jo soz-e-mohabbat mein jalte rahe
andheron ki qismat badalte rahe
dil-o-jaan karta tha jin par nisar
mere nam se kyon wo jalte rahe


unhi ko mile manzilon ke nishan
jo har gam gir kar sanbhalte rahe
khuda ne diye the jinhen hausle
hawaon ke rukh wo badalte rahe


hue manzilon se shanasa wo hi
meri rahbari mein jo chalte rahe
raha mujh pe ye bhi khuda ka karam
mere sar se tufan talte rahe


main manzil pe apni pahunch bhi gaya
jo hasid the hath apne malte rahe
buzurgon ke naqsh-e-qadam jis pe the
usi rah pe 'rizwan' chalte rahe