jo talluq hai chaman mein phul ka khushbu ke sath
hai wahi rishta musalman ka yahan hindu ke sath

hai wahi nisbat hamari sar-zamin-e-hind se
jo hai nisbat shairi mein mir ki urdu ke sath

aarzi hai husn-e-duniya dar-haqiqat doston
is liye hi amrpali chal padi bhikshu ke sath

lad rahe the jang donon mukhtalif andaz mein
main tha haq ke sath aur wo quwwat-e-bazu ke sath

jis tarah se chand chamke badliyon ke bich mein
kis tarah chehra tha raushan turra-e-gesu ke sath

kal jise main ne sikhae the alif be te 'bilal'
baat wo karta hai mujh se aaj-kal be tu ke sath