jo yun banae hain aurat namaz aur KHushbu

jo yun banae hain aurat namaz aur khushbu
khuda ke sae hain aurat namaz aur khushbu
wahan ki khak kisi nur se bani hogi
jahan se aae hain aurat namaz aur khushbu


bahut kathin hai samana zamin ke rangon mein
magar samae hain aurat namaz aur khushbu
hua hai asr se maghrib ke darmiyan ka waqt
faza pe chhae hain aurat namaz aur khushbu


har ek chiz kisi ne banai hogi magar
bane banae hain aurat namaz aur khushbu
jo kaenat ne dekhe nahin the pahle kabhi
wo khwab lae hain aurat namaz aur khushbu