jo zindagi mein kisi ke bhi kaam aa na sake

jo zindagi mein kisi ke bhi kaam aa na sake
wo zindagi mein kabhi zindagi ko pa na sake
ye kis maqam pe qismat ne la ke chhod diya
jahan khushi mein bhi hum log muskura na sake


wo kya mitaega zulmat-kadon ki tariki
jo ek charagh bhi ghar ke liye jala na sake
wo kya uthaega auron ka bojh rahon mein
jo apne aap ka bar-e-garan utha na sake


junun-e-shauq ne pohncha diya kuchh aisi jagah
hawas-o-hosh jahan mere sath aa na sake
talash-e-manzil-e-hasti mein kho gae 'sabir'
milegi kya unhen manzil jo khud ko pa na sake