juD jate toDe jate agar darmiyan se hum

jud jate tode jate agar darmiyan se hum
tode magar gae hain yahan se wahan se hum
duniya pe ab yaqin bhala aae kis tarah
rahte hain apne aap se kuchh bad-guman se hum


hum ko khabar nahin hai ki jaenge hum kahan
ye bhi pata nahin hai ki aae kahan se hum
us ki dalil ne kiya is bar la-jawab
har bar jit jate the zor-e-bayan se hum


pahunche nahin zamin pe mu'allaq hi rah gae
kuchh is tarah se phenke gae aasman se hum
ab ke wahan lagi hain gulon ki numaishen
kante bator lae the jis gulsitan se hum


hum tez chal rahe the bahut is liye 'kamal'
is jurm par nikale gae karwan se hum