کبھی میں چلوں کبھی تو چلے کبھی بے مزہ یہ سفر نہ ہو

کبھی میں چلوں کبھی تو چلے کبھی بے مزہ یہ سفر نہ ہو
کسے منزلوں کی تلاش ہے ہمیں چلتے رہنے کا ڈر نہ ہو
کہاں شب ہے اور کہاں سحر کہاں دھوپ اور کہاں چاندنی
میں ترے گمان میں ہی رہوں مجھے ان سبھی کی خبر نہ ہو


یہ جو آنسوؤں کا لفافہ ہے کئی درد اس میں پلے بڑھے
کبھی جھانک لے مری آنکھ میں تجھے اعتبار اگر نہ ہو
نہ عیاں ہوئیں مری خامیاں نہ عیاں ہوئیں تری خامیاں
کوئی کرنا چاہے بھی گر عیاں تو صدا میں اس کی اثر نہ ہو