kahne se na mana kar kahunga
tu meri na sun magar kahunga

tum aap hi aae yun hi sach hai
nale ko na be-asar kahunga

gar kuchh bhi sunenge wo shab-e-wasl
kya kya na mein ta-sahar kahunga

kahte hain jo chahte hain dushman
main aur tumhein fitna-gar kahunga

kahte to ye ho ki tu hai achchha
manoge bura agar kahunga

yun dekh ke mujh ko muskurana
phir tum ko main be-khabar kahunga

ek baat likhi hai kya hi main ne
tujh se to na nama-bar kahunga

kab tum to kahoge mujh se puchho
main bais-e-dard-e-sar kahunga

tujh se hi chhupaunga gham apna
tujh se hi kahunga gar kahunga

malum hai mujh ko jo kahoge
main tum se bhi pesh-tar kahunga

hairat se kuchh un se kah sakunga
bhulunga ka idhar udhar kahunga

kuchh dard-e-jigar ka hoga bais
kyun tujh se main chaara-gar kahunga

ab haal-e-'nizam' kuchh na puchho
gham hoga tumhein bhi gar kahunga