کیسے تیور ہیں اب ہوا کے دیکھ

کیسے تیور ہیں اب ہوا کے دیکھ
گھر سے پہلے دیا جلا کے دیکھ
اس کے خط میں کوئی دلاسہ ڈھونڈ
کوئی جملہ گھٹا بڑھا کے دیکھ


شہر میں خاک تو ملے گی نہیں
کوئی افواہ ہی اڑا کے دیکھ
ان کا دیوان کچھ تو کام آئے
حال دل میرؔ کو سنا کے دیکھ


اس کی محفل میں جائے روتا ہوا
نامہ بر کو سکھا پڑھا کے دیکھ
گر مرا رقص دیکھنا ہے تو
کچھ مرے کان میں بتا کے دیکھ


اس کی خوشبو کہیں گئی تو نہیں
گھر کے پردہ ہلا ہلا کے دیکھ
آئنے رحم دل بھی ہوتے ہیں
شرط یہ ہے کہ سر جھکا کے دیکھ


ہنستے ہیں یا اداس ہوتے ہیں
پاس والوں کو دور جا کے دیکھ