kaisi farhat dilon pe chhai hai
aap aae bahaar aai hai

har-nafas par charagh hai raushan
main ne ghar mein murad pai hai

tere hote aur aisi majburi
mere allah teri duhai hai

naghma-ha-e-dil-e-shikasta par
aadamiyat bhi thartharai hai

kahin marta hai aap ka banda
dushmanon ne khabar udai hai

chum lun kyon na apni surat ko
kis ke hathon ne ye banai hai

dam-e-akhir 'qadir' wo aae
kya khizan mein bahaar aai hai