kal KHud mujhe ruswa sar-e-bazar karoge

kal khud mujhe ruswa sar-e-bazar karoge
tum subh se pahle mera inkar karoge
khair ab to hue maskh riwayat ke khare dam
kya kal bhi yahi jhut ka byopar karoge


tufan to umda chala aata hai saron par
phir shahr ko kis lamhe khabar-dar karoge
aakhir ko to mitti hain ye mitti ke gharaunde
ta'mir kahan tak dar-o-diwar karoge


loge na khabar dil ke kharabe ki magar han
zebaish-e-har-kucha-o-bazar karoge
main ab to khatakta hun magar dur nahin waqt
baaten meri parkhoge mujhe pyar karoge


hai apne liye shahr 'bashir' apna yahi dasht
kya ja ke bhala shahr mere yar karoge