kali kali ke baja raazdar hain hum log
chaman ko fakhr hai jin par wo khar hain hum log

lahu se apne gulistan ko sabza-zar kiya
bahut khulus ke aaina-dar hain hum log

haqir jaan ke thukra rahe hain ahl-e-chaman
chaman mein apni jagah khud bahaar hain hum log

kuchh aisa gardish-e-dauran ka dekhte hain fusun
ki aaj ahl-e-gulistan pe bar hain hum log

sitam ye hai ki zamane ka gham uthane par
qarar pate nahin be-qarar hain hum log

yahi hai dawat-e-aish-o-nishat roz-o-shab
khushi ka zikr nahin ashk-bar hain hum log

hamare ahd-e-guzishta ki dekhiye tarikh
khud apni shan mein zi-iftikhar hain hum log

qadam qadam pe masaib utha rahe hain 'khizr'
khuda-gawah ki phir gham-gusar hain hum log